Rétinopati a dyabèt

KONNÈT RÉTINOPATI A DYABÈT

Rétinopati a dyabèt ka vin dè on konplikasyon a dyabèt a sik. I ka touché ti venn adan rétin-la é i ka mèt vizyon a moun an danjé.

– Jòdijou, rétinopati a dyabèt sé yonn adan lé pi gran kòz moun ka vin avèg. Pou vyé moun, sé katriyèm pwoblèm an zyé apré katarak, glokòm é DMLA ; li-menm sé prèmyé kòz moun ka vin avèg avan 50 lanné adan péyi dévlopé.

– Rétinopati a dyabèt ka aparèt on kenzèn lanné apré dyabèt évoliyé. Opi dyabèt-la mal trété, opi i ni chans aparèt. Sé davwa twòp sik an san pé izé ti venn an zyé.

– Rétinopati a dyabèt pé klasé silon dé èstad a évolisyon a-y: non-démiltipliyan (gran bonè) é démiltipliyan (pi ta).

 

• Rétinopati a dyabèt non-démiltipliyan: sé fòm pi abityèl a rétinoplati a dyabèt. Sé li yo ka jwenn lè i poko gè vansé. Lè yo ka ègzanminé fon a zyé-la, sa yo kè vwè abityèlman sé sign a iskémi an rétin.
• Rétinopati a dyabèt démiltipliyan: ka vin lè ni on iskémi an rétin pi rèd. Lé sign yo ka jwenn abityèlman adan ka-lasa sé nouvo ti venn, koulmandsan an rétin é rétin dékolé, èvè on gran risk a vin avèg.

 

AJI ASI RÉTINOPATI A DYABÈT

Dyanòstik

Yenki on dòktè-a-zyé pé dyanòstiké rétinopati a dyabèt.

Fo on lègzanmen a akité vizyèl é on lègzanmen a fon a zyé-la pou fè on dyanòstik.

Dòt lègzanmen ankò, kon Tomografi an Koyérans Òptik (Tomographie en cohérence optique, OCT) ou on anjyografi pé fèt pou on dyanòstik pi prési.

Trètman

Prèmyé trètman kont rétinopati a dyabèt, sé aksyon prévansyon, ki vé di kontwòl rèd a sik an san é a pwésyon an venn.

Adan lé prèmyé èstad a rétinopati a dyabèt non-démiltipliyan, nikit véyé évolisyon, chak lanné an jénéral.

Lè sé rétinopati a dyabèt démiltipliyan, diféran trètman pé fèt, dapré èstad a malad-la é si ni konplikasyon:

•     fotokoagilasyon pan rétinièn o lazè: trètman èspésyal pou rétinopati a dyabèt démiltipliyan.
•    vitrèktomi chirijikal vitréyèn : pou trété koulmandsan an vitré é rétinopati a dyabèt démiltipliyan.
•   kòwtikoyid an piki entra-vitréyèn: ka anbonni onpil édèm makilè a dyabèt é akité vizyèl.
• trètman anti-anjyojénik èvè piki entra-vitréyèn: ka opozé nouvo ti venn fèt adan rétin-la.

 

AN FINAL DI KONT

Alèkilé, avèg davwa rétinopati a dyabèt pé évité byen lè i détèkté bonè é èvè on trètman adapté.

Sa pou fè menm, sé miltipliyé dépistaj sistématik pannan tout lavi.

Davwa dyabèt a sik sé on malad jénéral, lé pi bon trètman ka fèt si plizyè domèn: dòktè-a-dyabèt, dyététisyen, jénéralis…